Wasiirka Wasaaradda Gaashaandhigga Soomaaliya Cabdulqaadir Maxamed Nuur ayaa kulan sagootin ah la qaatay Ergeyga Gaarka ah ee Xoghayaha-Guud ee Qaramada Midoobay u qaabilsan Soomaaliya Ms. Catriona Laing.
Waxaa lagaga hadlay kulanka miro dhalka dadaallada dowladda iyo shacabka soomaaliyeed ay ugu jiraan hormarka dalka.
Catriona Laing ayaa kala hadashay Wasiirka, dagaalka ka dhanka ah Al-Shabaab, dadaallada xasilinta Soomaaliya iyo xilliga kala-guurka amniga ee ATMIS ay ku wareejinayaan amniga ciidamada Soomaaliya iyo arrimo kale.
Waxay ku nuuxnuuxsadeen in loo baahan yahay in sare loo qaado taageerada aqooneed ee ay saaxiibbada caalamku siinayaan Ciidanka XDS iyo in la dhiso awooddooda.
Waxaa kale oo kulanka lagu gorfeeyay muhiimada kaalinta Qaramada midoobay ee taageerada dib u dhiska Ciidamada iyo guud ahaan xasilloonida Soomaaliya.
